محمد الحلو: "شرف ليا إن أبو ناصر يكلمني على المسرح واتفاجئت بإنه عايزني في حفلة تاني"

تحدث الفنان محمد الحلو عن مشاركته في حفل "كاسيت 90" والذي أقيم بجدة في المملكة العربية السعودية، حيث ضم كوكبة من نجوم التسعينات.

وقال محمد الحلو: "بصراحة قولت ممكن يتعاد الحفل في موسم الرياض إنما فوجئت على السوشيال ميديا بصفحة الوزير وقال إننا مكتفناش بصوته ونعمله حفلة يوم 1 سبتمبر، استغرب والله وقولت ممكن بقى عايز يهديني ويحيني".

وتابع "الحلو" قائلا: عاوز أقول صراحة من أول ما نزلت من الطيارة وبياخدونا على العربيات وبعدين بنمشي، مش بنمسك شنطة وفيه تنظيم هايل زائد لما الناس قابلوني كانوا مفاجأة ولما غنيت ليالي الحلمية لقيت صريخ، بقى قلبي فرحان، زائد الكرم الكبير اللي أنا شوفته فأنا ماشي من هنا في دماغي هقدم إيه؟ فقولت مفيش غير صوتي أقدم بيه غنوة يبقى هدية من هدايا اللي ادوهاني الجمهور والمملكة.

وأضاف: "كلمت مصطفى كامل ومصطفى بيفهم في الحاجات دي وهو شاف الحفلة وعملي الكلام ولحنه وادينا الأغنية للموزع أمير عبد المجيد هو كان عنده شغل ولكن أنا حبيب عمره ودي السعودية وهو كمان سعودي مصري، فعملناها وطلعت بالشكل ده الحمد لله، بعد ما اتناقشنا في شوية تفاصيل ومعظم الأغنية طلعت من أول مرة"

واختتم حديثه قائلا: " لا أنا متفاجئتش أنا اتخضيت، مكنتش متوقع كده أبدًا ودي أول مرة تحصل، مبقيتش عارف اعمل إيه وباصص لأمير مش عارف هو كمان يعمل إيه وكان شرف كبير جدًا على رأسي إنه يكلمني على المسرح أبو ناصر قدام العالم العربي وهو وزير، أنا آه كبير في السن إنما ده شرف أكبر مني".